Die eerste digbundel van Sharmaine Grobbelaar bevat 'n boodskap vir mense wat as bipolêr gediagnoseer en behandel word, sowel as ander wat met hulle te doen kry. Die eerste bekendstelling het 13 September 2014 by die Huis vir Afrikaanse poësie in Capital Park, Pretoria, plaasgevind. Dr Ian Raper het die woord gedoen en gedigte uit die bundel voorgelees. Die verse en die bundel kan o.a. beskou word as "poësie as terapie". Daar is bnne hierdie webwerf 'n bladsy aan die onderwerp gewy. Dis voorlopig net in Engels, maar die Afrikaanse weergawe word voorberei. Ons sien uit na 'n volgende geleentheid waar die skrywer persoonlik haar bundel kan voorstel en kopieë teken. 
|
Woorde in die wind
Hier is Sharmaine Grobbelaar se eie perspektief op die bundel en sy publikasie.
Die emosie en worstelings van die digter, met inbegrip van Bipolêre Gemoeds-versteuring, het haar laat twyfel of die boek enigsins gepubliseer moet word. Maar wonderlike mense het van die gedigte gelees soos dit die een na die ander geskryf is en haar aangemoedig om dit te laat publiseer. Die digter het besef dat hierdie gedigte ook ‘n bewys is dat mens, selfs in donker oomblikke, nog steeds sag en nederig kan wees en die Vader se Hand nie mag los nie. Van die gedigte is die resultaat van die digteres se onuitputlike verbeeldingskrag waar die mooi in alles gesien word. Dit vertel ook met groot eerlikheid van die minder goeie dae en dinge. Die Lig en Liefde van Vader skyn helder en verlig enige donker plek; dis na hierdie Lig wat die digter altyd weer terugkeer. Dis gedigte van wipplank-ry tussen Lig en donker, vergifnis, aanvaarding en vrae sonder antwoorde. Die bundel kos R150-00. Bestel dit by rosslyni@lantic.net d.m.v. onderstaande vorm of by Erna van Bloots-boeke by ejpoetry.com. |